About us...

ນັກສຶກສາສົງລາວ ວິທະຍາໄລສົງຊຽງຣາຍ

ມະຫາວິທະຍາໄລມະຫາຈຸລາລົງກອນຣາຊະວິທະຍາໄລ

I.   ປະຫວັດແລະຄວາມເປັນມາຂອງຊົມຣົມນັກສຶກສາສົງລາວ

ນັບຕັ້ງແຕ່ອະດີດເປັນຕົ້ນມາໄດ້ມີພຣະສົງສາມະເນນລາວຈຳນວນຫຼວງຫຼາຍໄດ້ເຂົ້າມາສຶກສາຮ່ຳຮຽນແລະເຊື່ອມຕໍ່ລະດັບປະລິນຍາຕີ ປະລິນຍາໂທ ແລະປະລິນຍາເອກ ໃນສະຖາບັນຂອງມະຫາວິທະຍາໄລຕ່າງ ໆ ໃນຣາຊອານາຈັກໄທ ອີກທັ້ງຍັງເປັນແຫຼ່ງສຶກສາຮຽນຮູ້ຄຳພີພຣະໄຕຣປີດົກແລະນັກທັມ-ບາລີຊັ້ນປະໂຫຍກຕ່າງ ໆ ທັ້ງທັງຝ່າຍສົງແລະຝ່າຍຄະລາວາດ

ສຳຫຼັບພຣະນິສິດນັກສຶກສາສົງລາວ ວິທະຍາໄລສົງຊຽງລາຍ ມະຫາວິທະຍາໄລມະຫາຈູລາລົງກອນຣາຊວິທະຍາໄລ ຈັງຫວັດຊຽງລາຍ ກໍ່ມີພຣະສົງ-ສຳມະເນນລາວຈຳນວນໜຶ່ງໄດ້ເຂົ້າມາສຶກສາຮ່ຳຮຽນລະດັບປະລິນຍາຕີແລະປະລິນຍາໂທ ນອກຈາກນັ້ນກໍ່ຍັງມີພຣະສົງ-ສຳມະເນນເຂົ້າມາພັກອາໄສເພື່ອສຶກສາພຣະທັມວິນັຍແລະເຂົ້າຮຽນໂຮງຮຽນພຣະປະຣິຍັຕິທັມແລະໂຮງຮຽນການສຶກສານອກລະບົບ (ກ.ສ.ນ.) ທຽບເທົ່າລະດັບມັດຍົມຕົ້ນແລະມັດທະຍົມປາຍ ທັ້ງນີ້ກໍ່ເພື່ອເປີດໂອກາດໃຫ້ແກ່ພຣະສົງ-ສຳມະເນນຜູ້ມີຄວາມປະສົງຢາກສຶກສາຮ່ຳຮຽນຕໍ່ໃນຣາຊອານາຈັກໄທ ໂດຍໃຊ້ຫນັງສືຜ່ານແດນໃຫ້ຖືກຕ້ອງຕາມກົດໝາຍບ້ານເມືອງ. ການທີ່ພຣະສົງ-ສຳມະເນນຈຳເປັນຕ້ອງເຂົ້າມາສຶກສາຮ່ຳຮຽນຢູ່ໃນປະເທດເພື່ອນບ້ານກໍ່ເນື່ອງຈາກວ່າບ້ານເມືອງເຮົາຍັງບໍ່ໄດ້ໃຫ້ການສະໜັບສະໜູນທາງດ້ານການສຶກສາຂອງພຣະສົງແລະສາມະເນນຢ່າງພຽງພໍຕໍ່ຄວາມຕ້ອງການ ເຊັ່ນ ມະຫາວິທະຍາໄລສົງ ເປັນຕົ້ນ ດັ່ງນັ້ນເມື່ອພຣະສົງ-ສາມະເນນຮຽນຈົບຈາກມັດທະຍົມສົມບູນສົງຫຼືວິທະຍາໄລສົງຢູ່ລາວແລ້ວແລະມີເປົ້າໝາຍຢາກເຊື່ອມຕໍ່ລະດັບປະລິນຍາຕີຫຼືໂທທາງຝ່າຍສົງອີກ ເຊິ່ງຈະມີມະຫາວິທະຍາໄລທີ່ເປັນຂອງພຣະສົງ ຈຳນວນ 2 ແຫ່ງ ເຊັ່ນ ມະຫາວິທະຍາໄລມະຫາຈູລາລົງກອນຣາຊວິທະຍາໄລ ແລະມະຫາວິທະຍາໄລມະຫາມະກຸດຣາຊວິທະຍາໄລ ທັ້ງໃນກຸງເທບມະຫານະຄອນ, ປະລິມົນທົນ ແລະວິທະຍາເຂດຕ່າງ ໆ ໃນແຕ່ລະຈັງຫວັດທົ່ວປະເທດ ເພື່ອໃຫ້ພຣະສົງສຳມະເນນທີ່ອາໄສຢູ່ເຂດຈັງຫວັດທີ່ໃກ້ຄຽງໄດ້ມີໂອກາດເຂົ້າມາສຶກສາຮ່ຳຮຽນໄດ້ສະດວກຍິ່ງຂື້ນ ແລະພຣະສົງສາມະເນນລາວເຮົາກໍ່ເຊັ່ນກັນ ຜູ້ທີ່ອາໄສຢູ່ເມືອງ/ແຂວງຕ່າງ​ໆ ທີ່ຕິດກັບຊາຍແດນກໍ່ຈະມີໂອກາດເດີນທາງເຂົ້າມາສຶກສາຮ່ຳຮຽນແລກປ່ຽນຄວາມຮູ້ເສື່ອມຄວາມສັມພັນໄມຕຣີມິຕິພຣະພຸດທະສາສະໜາອັນດຽວກັນກັບປະເທດເພື່ອນບ້ານໃຫ້ມີຄວາມແໜ້ນແຟ້ນຍິ່ງຂື້ນ.

ອີກປະການໜຶ່ງ ວິທະຍາໄລສົງຊຽງລາຍ ມະຫາວິທະຍາໄລມະຫາຈູລາລົງກອນຣາຊວິທະຍາໄລ ເຊິ່ງຕັ້ງຢູ່ໃນໃຈກາງເມືອງຊຽງລາຍ ແລະເປັນຈັງຫວັດທີ່ຢູ່ເໜືອສຸດຂອງປະເທດໄທ ອັນມີພູມລຳເນາທີ່ອຸດົມສົມບູນຄືກັບແຂວງພາກເໜືອຂອງລາວ ໂດຍສະເພາະຈັງຫວັດຊຽງລາຍມີຊາຍແດນຕິດກັບແຂວງບໍ່ແກ້ວແລະຍັງຕິດກັບເມືອງທ່າຂີ້ເຫຼັກປະເທດພະມ້າຫຼືເຮົາເອີ້ນວ່າ “ສາມຫຼ່ຽມທອງຄຳ” ຊຶ່ງເປັນໂອກາດອັນດີທີ່ພຣະສົງສາມະເນນຈາກສອງປະເທດສາມາດເດີນທາງເຂົ້າມາສຶກສາຮຽນຮູ້ໄດ້ຢ່າງສະດວກສະບາຍ

ດັ່ງນັ້ນ ເມື່ອມີພຣະສົງສາມະເນນລາວເຮົາໄດ້ມາເຂົ້າສຶກສາຮ່ຳຮຽນເປັນຈຳນວນເພິ່ມຂື້ນໃນແຕ່ລະປິ ຈຶ່ງຕ້ອງມີການລວມຕົວເປັນກຸ່ມພຣະນິສິດລາວຂື້ນ ແລະກາຍມາເປັນຊົມຣົມນັກສຶກສາສົງລາວຈົນເຖິງປັດຈຸບັນ ນັບວ່າເປັນການລວມຕົວແລະສ້າງຄວາມສຳພັນລະຫວ່າງພຣະສົງສາມະເນນລາວດ້ວຍກັນ ເພື່ອສ້າງຄວາມສາມັກຄີຊ່ວຍເຫຼືອເຊິ່ງກັນແລະກັນ ບໍ່ວ່າຈະເປັນດ້ານເອກະສານການສຶກສາ ດ້ານກິດຈະກຳແລະດູແລຄວາມເປັນລະບຽບຮຽບຮ້ອຍໃຫ້ກັບພຣະສົງສາມະເນນທີ່ຈະເຂົ້າມາໃຫມ່ອີກດ້ວຍ

II. ວັດຖຸປະສົງຂອງການຈັດຕັ້ງຊົມຣົມ

     1.    ເພື່ອເປັນຈຸດສູນລວມຂອງພຣະສົງສາມະເນນລາວທີ່ມາສຶກສາຢູ່ຊຽງລາຍ

     2.   ເພື່ອສົ່ງເສີມໃຫ້ພຣະສົງສາມະເນນມີຄວາມສາມັກຄີຊ່ວຍເຫຼືອກັນແລະກັນ

     3.   ເພື່ອເປັນບ່ອນປະສານງານແລະໃຫ້ຄຳປຶກສາເວລາພົບຂໍ້ຫຍຸ້ງຍາກຕ່າງ ໆ

     4.   ເພື່ອສົ່ງເສີມໃຫ້ພຣະສົງສາມະເນນໄດ້ເຮັດກິດຈະກຳຮ່ວມກັນເປັນທີມ

     5.   ເພື່ອຊ່ວຍເຫຼືອດ້ານເອກະສານການເດີນທາງແລະການສຶກສາຕ່າງ ໆ

     6.   ເພື່ອຈັດຫາວັດຫຼືທີ່ພັກອາໄສໃຫ້ພຣະສົງສາມະເນນທີ່ມາຢູ່ໃຫມ່

     7.   ເພື່ອສ້າງຄວາມສຳພັນໄມຕຣີມິຕິພຣະພຸດທະສາສະໜາຕໍ່ປະເທດເພື່ອນບ້ານ

III.      ລະບຽບການຈັດຕັ້ງຊົມຣົມພຣະນິສິດນັກສຶກສາສົງລາວວິທະຍາໄລສົງຊຽງລາຍ

2.1 ອິງຕາມມະຕິຕົງລົງເຫັນດີເປັນເອກະພາບຂອງພຣະນິສິດນັກສຶກສາສົງລາວ ວ່າດ້ວຍການຈັດຕັ້ງຊົມຣົມນັກສຶກສາສົງລາວ ປະຈຳວິທະຍາໄລສົງຊຽງລາຍ ໃນວັນພະຫັດທີ່ 13 ກັນຍາ 2555 ເປັນຕົ້ນມາແລະໄດ້ມີມະຕິເຫັນດີເລືອກຕັ້ງເອົາ ພຣະສົມສັກ ສະມະຈິດໂຕ ເປັນປະທານຯ (2555-ປັດຈຸບັນ) ຕໍ່ຈາກ ພຣະອາຈານໄຊຍະພອນ ສີປັນຍາ ອະດີດ (ຜູ້ດູແລພຣະນັກສຶກສາສົງລາວ ມ.ຈ.ຣ.ຫ້ອງຮຽນວັດພຣະແກ້ວ ຈັງຫວັດຊຽງລາຍ) 2550-2554

2.2 ມີການຈັດລະບຽບແບບແຜນໂຄງຮ່າງການຈັດຕັ້ງການບໍລິຫານສ່ວນງານຂອງພຣະນິສິດນັກສຶກສາສົງລາວປະຈຳວິທະຍາໄລສົງຊຽງລາຍໃນປີ 2555-ປັດຈຸບັນ ກໍ່ໄດ້ມີການຈັດຕັ້ງແລະແບ່ງຫນ້າທີ່ຮັບຜິດຊອບຂອງພຣະເນນແຕ່ລະອົງ/ຕົນ ເພື່ອຊ່ວຍເຫຼືອຊຶ່ງກັນແລະກັນບໍ່ວ່າຈະເປັນການປະກອບເອກສານການສຶກສາ/ໜັງສືຜ່ານແດນແລະພາກສ່ວນກິດຈະກຳ ເປັນຕົ້ນ ພ້ອມກັນນັ້ນຍັງອຳນວຍຄວາມສະດວກໃຫ້ແກ່ພຣະສົງສຳມະເນນລຸ້ນນ້ອງທີ່ຕ້ອງການເຂົ້າມາສຶກສາຢູ່ວິທະຍາໄລສົງຊຽງລາຍໃນຕໍ່ໜ້າ

2.3 ຊົມຣົມນັກສຶກສາສົງລາວ ປະຈຳວິທະຍາໄລສົງຊຽງລາຍ ໄດ້ນຳເອົາກົດລະບຽບຕ່າງ ໆ ຂອງຊົມຣົມນັກສຶກສາສົງລາວສ່ວນກາງແລະສ່ວນວິທະຍາເຂດຊຽງໃຫມ່ມາປັບປຸງໃຊ້ໃຫ້ສອດຄ່ອງກັບພາລະບົດບາດໜ້າທີ່ຂອງຊົມຣົມນັກສຶກສາສົງລາວຈັງຫວັດຊຽງລາຍ ຕາມຂັ້ນເທິງວາງອອກ ເພື່ອຄວາມເປັນລະບຽບຮຽບຮ້ອຍແລະເປັນເອກະພາບກັນ ເພື່ອໃຫ້ຖຶກຕ້ອງຕາມແນວທາງນະໂຍບາຍຂອງພັກແລະລັດ ເພື່ອເຕົ້າໂຮມຄວາມສາມັກຄີຊ່ວຍເຫຼືອຊຶ່ງກັນ ກັນພາຍໃນໝູ່ຄະນະນັກສຶກສາກ່ຽວກັບຊີວິດການເປັນຢູ່ແລະເວລາພົບຂໍ້ຫຍຸ້ງຍາກຕ່າງ ໆ

IV.  ລະບຽບວ່າດ້ວຍຂໍ້ບັງຄັບການເລືອກຕັ້ງປະທານຊົມຣົມນັກສຶກສາສົງລາວ  ຊຽງລາຍ

-ອີງຕາມມະຕິຕົງລົງເຫັນດີເປັນເອກະພາບຂອງສະມາຄົມນັກສຶກສາສົງລາວສ່ວນກາງແລະສະມາຄົມນັກສຶກສາສົງລາວຊຽງໃຫມ່ປະຈຳເຂດພາກເໜືອ ໃຫ້ຄະນະພຣະນິສິດລາວທີ່ກຳລັງສຶກສາຢູ່ວິທະຍາໄລສົງຊຽງຣາຍ ມະຫາວິທະຍາໄລມະຫາຈູລາລົງກອນຣາຊວິທະຍາໄລ ສາມາດເລືອກຕັ້ງຫຼືແຕ່ງຕັ້ງເອົາພຣະຫຼືເນນອົງໃດອົງໜຶ່ງຂື້ນເປັນຕົວແທນຊົມຣົມນັກສຶກສາສົງລາວປະຈຳວິທະຍາໄລສົງຊຽງລາຍ ເພື່ອຈະໄດ້ດູແລກັນໃນເຂດພື້ນທີ່ໆຕົນປົກຄອງຢູ່ໃຫ້ມີຄວາມເປັນລະບຽບຮຽບຮ້ອຍ, ສາມາດດຳເນີນກິດຈະກຳ, ເກັບກຳສະຖິຕິ,ເອກະສານການສຶກສາ ແລະຂໍ້ມູນດ້ານຕ່າງ ໆ ແລະຊ່ວຍເຫຼືອຊຶ່ງກັນແລະກັນໃນກາລຕ່າງ ໆ ດັ່ງນັ້ນຈຶ່ງຕ້ອງໃຫ້ມີການເລືອກຕົວແທນຜູ້ໃດຜູ້ຫນຶ່ງທີ່ເຫັນວ່າມີຄຸນສົມບັດດີ ມີຄວາມເສຍສະລະເພື່ອຊົມຣົມຈຶ່ງສົມຄວນໃຫ້ມີການຈັດຕັ້ງຊົມຣົມຂື້ນ ໂດຍສັງກັດໃນສະມາຄົມນັກສຶກສາສົງລາວ ປະຈຳເຂດພາກເໜືອຊຽງໃຫມ່

- ການປະຕິບັດໜ້າທີ່ຂອງປະທານຊົມຣົມ ຮອງປະທານ ແລະຄະນະດູແລຝ່າຍຕ່າງ ໆ ມີການກຳໜົດການເລືອກຕັ້ງແລະແຕ່ງຕັ້ງມີໜ້າທີ່ດັ່ງຕໍ່ໄປນີ້

ຂໍ້ (1) ໃຫ້ພຣະນິສິດລາວວິທະຍາໄລສົງຊຽງຣາຍເລືອກຕັ້ງປະທານຊົມຣົມຄົນໃຫມ່ໄດ້

        ທຸກ  ໆ 2 ປີ/ຄັ້ງ

ຂໍ້ (2) ຜູ້ເຂົ້າສະໝັກເລືອກຕັ້ງຫົວໜ້າຊົມຣົມຄົນໃຫມ່ຕ້ອງຮຽນຢູ່ປີ 1, 2 ແລະ 3

ເທົ່ານັ້ນ ໂດຍບໍ່ຈຳກັດສາຂາວິຊາຮຽນ

ຂໍ້ (3) ການເລືອກຕັ້ງປະທານຊົມຣົມຄົນໃຫມ່ແມ່ນກຳໜົດເອົາເລີ່ມແຕ່ວັນທີ່ 13

ກັນຍາຂອງທຸກໆ 2 ປີ ພາຍໃນໄລຍະເວລາບໍ່ໃຫ້ເກີນ 15 ມື້

ຂໍ້ (4) ສຳຫຼັບການແຕ່ງຕັ້ງຄະນະດູແລດ້ານຕ່າງ ໆ ແມ່ນໃຫ້ປະທານຊົມຣົມຄົນໃຫມ່

ເປັນຜູ້ຊີ້ແຈງແລະມອບໜ້າທີ່ຮັບຜິດຊອບໃຫ້ຕາມຄວາມເໝາະສົມກັບງານ

ຂໍ້ (5) ຄະນະດູແລຝ່າຍຕ່າງ ໆ ສາມາດສະເໜີແລະຍົກຍ້າຍໜ້າທີ່ຮັບຜິດຊອບຂອງ

ຕົນໄດ້ໃນຂະນະທີ່ມີເຫດຈຳເປັນຕ້ອງປ່ຽນ

ຂໍ້ (6) ຂະນະທີ່ປະທານຊົມຣົມຄົນໃຫມ່ກຳລັງດຳລົງຕຳແໜ່ງກໍ່ຕ້ອງສານຕໍ່ນະໂຍບາຍ

        ເກົ່າແລະສະເໜີນະໂຍບາຍໃຫມ່ ເພື່ອໃຫ້ຄະນະພຣະນິສິດລາວໄດ້ຮັບຮູ້ຮັບຊາບ

ຂໍ້ (7) ພຣະນິສິດນັກສຶກສາສົງລາວທຸກຄົນຕ້ອງພ້ອມພຽງຮຽງໜ້າກັນ ບໍ່ວ່າຈະມີການ

        ປະຊຸມຫຼືເຮັດກິດຈະກຳຕ່າງ ໆ

ຂໍ້ (8) ຊົມຣົມນັກສຶກສາສົງລາວປະຈຳວິທະຍາໄລສົງຊຽງລາຍຈະຕ້ອງມີການສະຫຼຸບ

ລາຍງານປະຈຳປີການສຶກສາຂອງທຸກໆປີໃຫ້ຮູ້ເຖິງ ດ້ານດີ  ດ້ານອ່ອນ  

ຂໍ້ຄົງຄ້າງ ເພື່ອນຳໄປປັບປຸງແກ້ໄຂໃນປີຖັດໄປ (ສຳຫຼັບວັນເວລາປະທານຊົມຣົມ

ເປັນຜູ້ກຳໜົດ ຕາມຄວາມເໝາະສົມ)

ຂໍ້ (9) ປະທານທີ່ປຶກສາແລະຄະນະກຳມະການສາມາດດຳລົງຕຳແໜ່ງໄດ້ຕະຫຼອດໄປ

ຍົກເວັ້ນມີເຫດຈຳເປັນຕ້ອງຍ້າຍໄປຢູ່ທີ່ອື່ນຫຼືລາສິກຂາອອກໄປ

ຂໍ້ (10)ຄະນະກຳມະການທີ່ປຶກສາມີໜ້າທີ່ເປັນກຳມະການເລືອກຕັ້ງປະທານຊົມຣົມ

ຂໍ້ (11) ລະບຽບວ່າດ້ວຍການເລືອກຕັ້ງປະທານແລະແຕ່ງຕັ້ງຄະນະຜູ້ບໍລິຫານຊົມຣົມ

ນັກສຶກສາສົງລາວຊຽງລາຍ ຕາມຂ້າງເທິງນີ້ຈະມີຜົນສັກສິດແລະບັງຄັບໃຊ້ໄດ້

ນັບຕັ້ງແຕ່ວັນທີ່ປະທານຊົມຣົມລົງນາມເປັນຕົ້ນໄປ

ທີ່ ວິທະຍາໄລສົງຊຽງລາຍ ອຳເພີເມືອງ ຈັງຫວັດຊຽງລາຍ

ລົງວັນທີ່ 15 ເດືອນກັນຍາ ພ.ສ.2555

(ລົງຊື່)...........................................

(ພຣະສົມສັກ ສະມະຈິດໂຕ)

ປະທານຊົມຣົມນັກສຶກສາສົງລາວ

ມຈຣ.ວິທະຍາໄລສົງຊຽງລາຍ

I.            V. ລະບຽບວ່າດ້ວຍສິດທິແລະຫນ້າທີ່ການບໍລິຫານງານຊົມຣົມນັກສຶກສາສົງລາວ

ສະບັບແກ້ໄຂເພີ່ມເຕີມ ວັນທີ່ 15 ກັນຍາ ພ.ສ.2556

       

        ເພື່ອໃຫ້ການດຳເນີນງານຂອງຄະນະກຳມະການບໍລິຫານຊົມຣົມນັກສຶກສາສົງລາວຊຽງລາຍ ໃນຣາຊອານາຈັກໄທ ລຸ້ນທີ່ 1 ປະຈຳປີ ພ.ສ.2555-2557 ເປັນໄປດ້ວຍຄວາມຮຽບຮ້ອຍຕາມວັດຖຸປະສົງຂອງຊົມຣົມ

-    ອາໄສຕາມກົດລະບຽບຂອງສະມາຄົມນັກສຶກສົງລາວວ່າດ້ວຍການຄຸ້ມຄອງນັກຮຽນນັກສຶກສາແລະຜູ້ປະຕິບັດສາສະນະກິດໃນຣາຊອານາຈັກໄທ ກຳໜົດໂດຍເອກອັກຄະລັດຖະທູດ ສປປ.ລາວ ປະຈຳບາງກອກ ປະເທດໄທ ເລກທີ່ 090/ສລບ.ກຂສ. ວັນທີ່ 13/5/1995.

-    ອາໄສຕາມລະບຽບວ່າດ້ວຍການເລືອກຕັ້ງຄະນະກຳມະການບໍລິຫານ ຂໍ້ທີ່ 8,9,10 ໝວດທີ່ 1 ແລະ 4

-    ອາໄສຕາມມະຕິຕົກລົງຂອງການປະຊຸມຊົມຣົມນັກສຶກສາສົງລາວຊຽງລາຍ ວັນທີ່ 13 ກັນຍາ 2555 ທີ່ວິທະຍາໄລສົງຊຽງລາຍ ມະຫາວິທະຍາໄລມະຫາຈຸລາລົງກອນຣາຊວິທະຍາໄລ ອຳເພີເມືອງ ຈັງຫວັດຊຽງລາຍ ມີມະຕິເຫັນຊອບທີ່ຈະພ້ອມພຽງກັນປະຕິບັດໜ້າທີ່ການບໍລິຫານງານຊົມຣົມນັກສຶກສາສົງລາວຊຽງລາຍດ້ວຍຄວາມສາມັກຄີແລະເສຍສະຫຼະເພື່ອໃຫ້ບັນລຸຕາມວັດຖຸປະສົງດຳເນີນໄປດ້ວຍດີ

        ດັ່ງນັ້ນ ຄະນະຊົມຣົມນັກສຶກສາສົງລາວຊຽງລາຍຈຶ່ງໄດ້ຈັດແບ່ງລະບຽບສິດທິແລະຫນ້າທີ່ການບໍລິຫານງານຊົມຣົມ ປະກອບດ້ວຍກັນດັ່ງຕໍ່ໄປນີ້:

1. ຄະນະກຳມະການທີ່ປຶກສາ

-      ເປັນປະທານໃນການປະຊຸມ

-      ຮັບຜິດຊອບໃນການດຳເນີນງານຂອງການປະຊຸມປະຈຳປີ

-      ຮັບຜິດຊອບໃນການຮັກສາໄວ້ຊຶ່ງຄວາມເປັນລະບຽບຮຽບຮ້ອຍໃນທີ່ປະຊຸມ

-      ໃຫ້ຄຳປຶກສາແລະຂໍ້ສະເໜີຕ່າງ ໆ ແກ່ຄະນະຜູ້ບໍລິຫານຊົມຣົມ

2.ປະທານຊົມຣົມ

-      ຮັບຜິດຊອບແລະຊີ້ນຳລວມ ລົງເລິກກ່ຽວກັບການຈັດຕັ້ງປະຕິບັດ ຕາມລະບຽບຂອງສະມາຄົມສູນກາງວາງອອກ

-      ມີສິດຕິດຕໍ່ສື່ສານກັບບຸກຄົນໃນອົງກອນແລະນອກອົງການຈັດຕັ້ງຕ່າງ ໆ ທີ່ເຫັນວ່າດີແລະມີປະໂຫຍດແກ່ຊົມຣົມ

-      ກຳໜົດວາລະແລະລະບຽບຂອງການປະຊຸມ

-      ຊີ້ນຳແນວທາງການບໍລິຫານງານຂອງຊົມຣົມຮ່ວມກັບຄະນະບໍລິຫານແຕ່ລະຝ່າຍໃຫ້ສອດຄ່ອງກັບນະໂຍບາຍແລະວັດຖຸປະສົງຂອງຊົມຣົມ

-      ແຕ່ງຕັ້ງຖອດຖອນຄະນະບໍລິຫານງານຊົມຣົມແຕ່ລະຝ່າຍໄດ້ຕາມຄວາມ     ເໝາະສົມຫຼືຕາມຄຳສະເໜີຂອງສະມາຊິກ

-      ມີອຳນາດຕັດສິນຊີ້ຂາດແລະໃຫ້ຄວາມຍຸຕິທັມໃນເລື່ອງຕ່າງ ໆ ແລະໃນເມື່ອປະຊຸມມີຄວາມຄິດເຫັນຂັດແຍ້ງກັນຈົນຫາຢຸດຕິບໍ່ໄດ້

3. ຮອງປະທານຜູ້ທີ່ 1

-      ຮັບຜິດຊອບວຽກງານລວມດ້ານການປກຄອງຂອງຊົມຣົມ ຕິດຕາມດູແລງານດ້ານເອກະສານວີຊ່າແລະເອກະສານຂາເຂົ້າ-ຂາອອກຢ່າງໃກ້ຊິດ

-      ດຳເນີນງານຕາມທີ່ປະທານມອບໝາຍໃຫ້ແລ້ວແຕ່ກໍລະນີຈຳເປັນກໍ່ໃຫ້ປະຕິບັດໜ້າທີ່ແທນໄດ້

-      ສາມາດປະຕິດບັດໜ້າທີ່ແທນໃນກໍລະນີທີ່ປະທານຊົມຣົມບໍ່ສາມາດປະຕິບັດງານໄດ້ຫຼືເດີນທາງໄປຕ່າງຖິ່ນ

-      ມີສິດຕັດສິນຕ່າງ ໆ ຕາມເຫດຜົນທີ່ເໝາະສົມແລະເປັນປະໂຫຍດຕໍ່ຊົມຣົມ

4. ຮອງປະທານຜູ້ທີ່ 2

-      ຮັບຜິດຊອບວຽກງານລວມດ້ານການສຶກສາຂອງຊົມຣົມ ຕິດຕາມດູແລກວດສອບການສຶກສາແລະຂື້ນທະບຽນນັກສຶກສາ

-      ຊີ້ນຳດູແລງານຝ່າຍກິດຈະກຳແລະການເຄື່ອນໄຫວນອກຫຼັກສູດ

-      ຊີ້ນຳດູແລງານຝ່າຍປະຊາສຳພັນແລະວຽກງານເຜີຍແຜ່

-      ຊີ້ນຳການຕິດຕໍ່ປະສານງານກັບມະຫາວິທະຍາໄລວິທະຍາເຂດຫຼືສະຖາບັນຕ່າງ ໆ ທີ່ມີພຣະນິສິດລາວອາໄສຢູ່

5.  ເລຂານຸການ

-      ດຳເນີນງານຕາມທີ່ປະທານຊົມຣົມມອບໝາຍໃຫ້

-      ເກັບກຳສະຖິຕິຂອງສະມາຊິກຊົມຣົມທຸກຢ່າງ

-      ຈັດລະບຽບວາລະການປະຊຸມທຸກຄັ້ງ

-      ບັນທຶກການປະຊຸມແລະສະຫຼຸບການເຄື່ອນໄຫວວຽກງານທຸກຄັ້ງ

-      ຕ້ອງທຳງານກັບຜູ້ບໍລິຫານຊົມຣົມທຸກຝ່າຍເພື່ອນຳສະເໜີງານໃຫ້ປະທານຊາບ

6. ຝ່າຍວິຊາການ

-      ຕິດຕາມກວດສອບຄະແນນ (ເກຣດ) ລົງເລິກດ້ານການສຶກສາແລະປະເມີນຜົນການຮຽນຂອງສະມາຊິກທຸກຄົນ ແລ້ວນຳສະເໜີທີ່ປະຊຸມຕໍ່ຄະນະບໍລິຫານ

-      ໃຫ້ຄຳແນະນຳແລະປຶກສາກ່ຽວກັບການຮຽນແກ່ສະມາຊິກທີ່ຍັງບໍ່ເຂົ້າໃຈ

-      ຕິດຕໍ່ປະສານງານເລື່ອງທຶນການສຶກສາຈາກຊົມຣົມວິທະຍາເຂດຫຼືອົງການຈັດຕັ້ງອື່ນ ໆ ທີ່ກ່ຽວຂ້ອງເພື່ອຊ່ວຍເຫຼືອສະມາຊິກທີ່ຂາດແຄນປັດໄຈ

-      ເກັບກຳຂໍ້ມູນຕາຕະລາງຮຽນ, ເອກະສານການຮຽນການສອນ, ການສອບເສັງ ແລະວາງແຜນຈັດກິດຈະກຳເສີມຫລັກສູດໃຫ້ແກ່ສະມາຊິກຮຽນຮູ້ເພີ່ມເຕີມ

7. ຝ່າຍກິດຈະກໍາ

-      ຈັດກຽມສະຖານທີ່ເພື່ອຈັດກິດຈະກຳຕ່າງ ໆ ຂອງຊົມຣົມ

-      ກຳໜົດແລະຈັດກຽມພິທີກຳທີ່ຈະຕ້ອງເຮັດໃນງານນັ້ນ ໆ

-      ຈັດກຽມເຄື່ອງສັກກາລະໃນງານພິທີກຳຕ່າງ ໆ

-      ຈັດເກັບວັດສະດຸ ອຸປະກອນໃນການຈັດກິດຈະກຳທຸກຄັ້ງ

8. ຝ່າຍບັນຊີການເງິນ

-      ຈັດເກັບຮັກສາເງິນຂອງຊົມຣົມ

-      ເຮັດບັນຊີລາຍຮັບ-ລາຍຈ່າຍຂອງຊົມຣົມ

-      ໃຊ້ເງິນທຸກຄັ້ງຕ້ອງໄດ້ຮັບຄວາມເຫັນຊອບຂອງປະທານຊົມຣົມຫຼືຮອງປະທານທັ້ງສອງເສີຍກອນ

-      ກໍລະນີທີ່ສະມາຊິກຕ້ອງການຄວາມຊ່ວຍເຫຼືອຕ້ອງໄດ້ຮັບຄວາມເຫັນຊອບ

ຈາກຄະນະກຳມະການບໍລິຫານຊົມຣົມ ຖ້າດ່ວນຕ້ອງແຈ້ງໃຫ້ປະທານຊາບ

-      ສະຫຼຸບບັນຊີປະຈຳເດືອນ, ປະຈຳພາກຮຽນ ແລະປະຈຳປີ ແລ້ວນຳສະເໜີຜົນລາຍຮັບລາຍຈ່າຍເຂົ້າທີ່ປະຊຸມ

9. ຝ່າຍປະຊາສຳພັນ

-      ຮັບຜິດຊອບການຕິດຕໍ່ປະສານງານກັບສະມາຄົມລາວສູນກາງກຸງເທບແລະຊຽງໃຫມ່ຫຼືໜ່ວຍງານຕ່າງ ໆ ທີ່ກ່ຽວຂ້ອງກັບຊົມຣົມ

-      ທຳໜ້າທີ່ພີທີກອນປະຈຳຊົມຣົມ ນຳສະເໜີຂໍ້ມູນຕ່າງ ໆ ທີ່ເປັນປະໂຫຍດຕໍ່ຊົມຣົມນັກສຶກສາສົງລາວຊຽງລາຍ

-      ຮັບຜິດຊອບດູແລເວັປໄຊ້ແລະເຟສບຸກກຸ່ມເພື່ອເຜີຍແຜ່ຂໍ້ມູນຂ່າວສານຮູບພາບກິດຈະກຳຂອງຊົມຣົມ

-      ຮັບຜິດຊອບດູແລການໂທລະສັບແຈ້ງການປະຊຸມແລະທຸກຄັ້ງທີ່ມີການເຄື່ອນໄຫວກິດຈະກຳຊົມຣົມ

10.        ຝ່າຍຈັດສະຖານທີ່

-      ຮັບຜິດຊອບການຈັດຫາທີ່ພັກ (ວັດ) ໃຫ້ພຣະນິສິດລຸ້ນນ້ອງ

-      ທຸກຄັ້ງທີ່ເພື່ອນສະມາຊິກຕ້ອງການຍ້າຍວັດຕ້ອງເຫັນຊອບຈາກປະທານຊົມຣົມກ່ອນຫຼືຮອງປະທານ

-      ດູແລຄວາມເປັນລະບຽບຮຽບຮ້ອຍຂອງສະມາຊິກທຸກຄົນ ຖ້າເຫັນພຶດຕິກຳບໍ່ດີບໍ່ງາມຕ້ອງແຈ້ງໃຫ້ປະທານຫຼືຮອງປະທານຊາບດ່ວນ

           ໜັງສືແຕ່ງຕັ້ງມອບໝາຍໜ້າທີ່ຮັບຜິດຊອບສະບັບນີ້ ມີຜົນບັງຄັບໃຊ້ນັບຕັ້ງແຕ່ວັນທີ່ປະທານຊົມຣົມລົງນາມແຕ່ງຕັ້ງເປັນຕົ້ນໄປ

       ທີ່ ວິທະຍາໄລສົງຊຽງລາຍ ອຳເພີເມືອງ ຈັງຫວັດຊຽງລາຍ

ລົງວັນທີ່ 15 ເດືອນກັນຍາ ພ.ສ.2556

(ລົງຊື່)...........................................

(ພຣະສົມສັກ ສະມະຈິດໂຕ)

ປະທານຊົມຣົມນັກສຶກສາສົງລາວ

I.      ສະຖິຕິພຣະສົງສໍາມະເນນລາວຊຽງລາຍ

ລວມຈຳນວນພຣະສົງສາມະເນນລາວຊຽງລາຍທັ້ງໝົດ

ປະຈຳປີພຸດທະສັກກະຣາຊ 2557-2558

ລ/ດ	ສະຖານສຶກສາ	ຈຳນວນ	ອົງ/ຕົນ	ໝາຍເຫດ
1.	ກໍາລັງສຶກສາຢູ່ວິທະຍາໄລສົງຊຽງລາຍ	9	ອົງ/ຕົນ
2.	ກໍາລັງປະຕິບັດສາສະນະກິດ	2	ອົງ
3.	ກໍາລັງຮຽນນັກທັມ-ບາລີ	2	ອົງ
4.	ຮຽນປະຣິຍັດແລະກສນ.	9	ຕົນ
5.	ຈໍາພັນສາປະຕິບັດສາສະນະກິດ	1	ອົງ
6.	ພຣະນິສິດລຸ້ນອ້າຍ (ກຳມະການຊົມຣົມ)	1	ອົງ
	ລວມທັງໝົດ	24	ອົງ/ຕົນ

II. ເອກະສານການສຶກສາຕ່າງ ໆ ກ່ອນເຂົ້າຮຽນວິທະຍາໄລສົງຊຽງລາຍ

    ເອກະສານສອບຄັດເລືອກເຂົ້າຮຽນລະດັບປະລິນຍາຕີ

Application For Bachelor Degree Entrance Examination

1.)   ສຳເນົາທະບຽນບ້ານ                                        1 ຊຸດ

2.)  ສຳເນົາຫນັງສືເດີນທາງ (passport)                      1 ຊຸດ

3.)  ສຳເນົາຫນັງສືສຸດທິ                                         1 ຊຸດ

4.)  ສຳເນົາສະແດງຜົນການສຶກສາ (ໃບຄະແນນຈົບຊັ້ນ)        2 ຊຸດ

5.)  ສຳເນົາໃບປະກາສະນີຍະບັດ ມ.ປາຍ / ທັມມະສຶກສາ     2 ຊຸດ

6.)  ຮູບຖ່າຍ 1 ນິ້ວເຄິງ                                         2 ໃບ

7.)  ອື່ນໆ....ຖ້າມີ

    ຄະນະແລະສາຂາທີ່ເປີດຮຽນ

1.    ຄະນະພຸທທະສາດ Faculty of Buddhism

-    ສາຂາວິຊາ: ພຣະພຸດທະສາສະຫນາ Buddhism Program

-    ເອກ: ພຣະພຸດທະສາສະຫນາ Buddhism Major

2.   ຄະນະສັງຄົມສາດ Faculty of Social Science

-    ສາຂາວິຊາ:ລັດທະປະສາສະນະສາດ Political Science Program

-    ເອກ: ບໍລິຫານລັດທະກິດ Public Management Major

3.   ຄະນະຄຣຸສາດ Faculty of Education

-    ສາຂາວິຊາ: ພາສາອັງກິດ EnglishProgram

-    ເອກ: ການສອນພາສາອັງກິດ English Teaching Major

4.   ຄະນະມະນຸດສາດ Faculty of Humanity

-    ສາຂາວິຊາ: ພາສາອັງກິດ English Program

-    ເອກ: ພາສາອັງກິດ English Major

    ການເຮັດເອກສານປະກອບການຂໍປ່ຽນການກວດລົງຕາປະເພດວີຊ່າ

To Change Non-Immigrant Visa

  

1.   ຫນັງສື ຂໍປ່ຽນຕຣວດລົງຕຣາປະເພດ Visa              ຈຳນວນ  1 ສະບັບ

2.   ຫນັງສືຮັບຮອງຄວາມເປັນນິສິດ                            ຈຳນວນ  1 ສະບັບ

3.   ຫນັງສື ຂໍອະນຸຍາດປ່ຽນປະເພດວີຊ່າຈາກສຳນັກພຸດ      ຈຳນວນ  1 ສະບັບ

4.   ຫນັງສືຮັບຮອງຈາກວັດ                                      ຈຳນວນ  1 ສະບັບ

5.   ສຳເນົາຫນັງສືເດີນທາງ                                        ຈຳນວນ  1 ຊຸດ

6.   ສຳເນົາຫລັກຖານທາງການສຶກສາ                            ຈຳນວນ  1 ຊຸດ

7.   ສຳເນົາໜັງສືສຸດທິ                                             ຈຳນວນ  1 ຊຸດ

8.   ຫນັງສືສຸດທິແປ                                               ຈຳນວນ  1 ຊຸດ

ໝາຍເຫດ:

-    ຫລັງຈາກຜູ້ກ່ຽວໄດ້ດຳເນີນການເອກະສານ Non-Immigrant Visa ຮຽບຮ້ອຍແລ້ວຈະຕ້ອງເອົາເອກສານເຫລົ່ານີ້ໄປຍື່ນທີ່ກົງສູນໄທປະຈຳບາງກອກ (ຖະໜົນແຈ້ງວັດທະນະ)

-    ຄ່າເຮັດເອກສານຂໍປ່ຽນລົງຕາປະເພດວີຊ່າ 2,000 ບາດ (ຈ່າຍຄັ້ງດຽວ)

  

    ເອກະສານປະກອບການແຈ້ງ Non-Immigrant Visa  1 ປີ ຂອງບຸກຄົນຕ່າງໆ

DOCUMENT TO NOTIFY OF NON-IMMIGRANT VISA ONE’S A YEAR

ໝາຍເຫດ:     

ປັດຈຸບັນດ່ານສາກົນຈັງຫວັດຊຽງລາຍ-ແຂວງບໍ່ແກ້ວມີຢູ່ 2 ແຫ່ງຄື:

-    ດ່ານຫ້ວຍຊາຍ - ຊຽງຂອງ

-    ດ່ານເມືອງຕົ້ນເຜິ້ງ (ສາມຫຼ່ຽມທອງຄຳ) - ອຳເພີຊຽງແສນ

    ເອກະສານປະກອບການແຈ້ງ Visa 90 ວັນ ຂອງບຸກຄົນຕ່າງໆ

   DOCUMENT TO NOTIFY VISA OF STAYING 90 DAYS

ການໄປແຈ້ງວີຊ່າ 90 ວັນ ນັ້ນ ແມ່ນບໍ່ຕ້ອງມີເອກະສານໃດແນບໄປດ້ວຍ ພຽງແຕ່ແຈ້ງ Passport ເພື່ອໃຫ້ເຈົ້າໜ້າທີ່ທາງ ຕ.ມ. ຮັບຮູ້ວ່າຕົນຍັງຢູ່ໃນປະເທດຖືກຕ້ອງຕາມກົດໝາຍ

ໝາຍເຫດ:   -ການແຈ້ງວີຊ່າ 90 ວັນ ແມ່ນບໍ່ມີຄ່າໃຊ້ຈ່າຍໃດທັ້ງສິ້ນ

- ຖ່າຍສຳເນົາເອກະສານPassport ໄປຍື່ນເຈົ້າໜ້າທີ່ ຕມ.ໃນອຳເພີທີ່ຕົນສັງກັດຢູ່

III.               ສະພາບລວມໂດຍຫຍໍ້ຂອງຊົມຣົມນັກສຶກສາສົງລາວຊຽງລາຍ

1)        ຄະນະບໍລິຫານງານຊົມຣົມນັກສຶກສາສົງລາວໄດ້ເຕົ້າໂຮມນໍາພາສະມາຊິກຈັດທໍາກິດຈະກຳຢູ່ສະເໝີ ເພື່ອສົ່ງເສີມທັກສະຄວາມຮູ້ນອກຫລັກສູດໃຫ້ມີປະສົບການຫລາຍຂື້ນ

2)       ຕິດຕໍ່ປະສານງານກັບວິທະຍາເຂດຕ່າງ ໆ ປະຊຸມຮ່ວມກັນປີລະ 1 ຄັ້ງຢ່າງໜ້ອຍ ເພື່ອຮ່ວມກັນວາງແຜນແກ້ໄຂບັນຫາທີ່ຂາດຕົກບົກພ່ອງຂອງນັກສຶກສາສົງລາວ, ບັນຫາໜັງສືເດີນທາງ, ບັນຫາການສຶກສາ ແລະບັນຫານັກສຶກສາສົງລາວເຂົ້າມາສຶກສາໃໝ່ ໂດຍທາງຄະນະກຳມະການບໍລິຫານຊົມຣົມນັກສຶກສາສົງລາວໄດ້ຮ່ວມກັນແກ້ໄຂບັນຫາເຫຼົ່ານັ້ນໃຫ້ສອດຄ່ອງກັບສະພາບຄວາມເປັນຈິງຕາມກົດລະບຽບຂອງມະຫາວິທະຍາໄລແລະກົດໝາຍບ້ານເມືອງວາງອອກ

3)       ມີການຈັດລະບຽບແບບແຜນໂຄງຮ່າງການຈັດຕັ້ງການບໍລິຫານສ່ວນງານຂອງພຣະນິສິດນັກສຶກສາສົງລາວປະຈຳວິທະຍາໄລສົງຊຽງລາຍໃນປີ 2555-ປັດຈຸບັນ ກໍ່ໄດ້ມີການຈັດຕັ້ງແລະແບ່ງຫນ້າທີ່ຮັບຜິດຊອບຂອງພຣະເນນແຕ່ລະອົງ/ຕົນ ເພື່ອຊ່ວຍເຫຼືອຊຶ່ງກັນແລະກັນບໍ່ວ່າຈະເປັນການປະກອບເອກສານການສຶກສາ/ໜັງສືຜ່ານແດນແລະພາກສ່ວນກິດຈະກຳ ເປັນຕົ້ນ ພ້ອມກັນນັ້ນຍັງອຳນວຍຄວາມສະດວກໃຫ້ແກ່ພຣະສົງສຳມະເນນລຸ້ນນ້ອງທີ່ຕ້ອງການເຂົ້າມາສຶກສາຢູ່ວິທະຍາໄລສົງຊຽງລາຍໃນຕໍ່ໜ້າ

4)       ຊົມຣົມນັກສຶກສາສົງລາວ ປະຈຳວິທະຍາໄລສົງຊຽງລາຍ ໄດ້ນຳເອົາກົດລະບຽບຕ່າງ ໆ ຂອງຊົມຣົມນັກສຶກສາສົງລາວສ່ວນກາງແລະສ່ວນວິທະຍາເຂດຊຽງໃຫມ່ມາປັບປຸງໃຊ້ໃຫ້ສອດຄ່ອງກັບພາລະບົດບາດໜ້າທີ່ຂອງຊົມຣົມນັກສຶກສາສົງລາວຈັງຫວັດຊຽງລາຍ ຕາມຂັ້ນເທິງວາງອອກ ເພື່ອຄວາມເປັນລະບຽບຮຽບຮ້ອຍແລະເປັນເອກະພາບກັນ ເພື່ອໃຫ້ຖຶກຕ້ອງຕາມແນວທາງນະໂຍບາຍຂອງພັກແລະລັດ ເພື່ອເຕົ້າໂຮມຄວາມສາມັກຄີຊ່ວຍເຫຼືອຊຶ່ງກັນແລະກັນພາຍໃນໝູ່ຄະນະນັກສຶກສາກ່ຽວກັບຊີວິດການເປັນຢູ່ແລະເວລາພົບຂໍ້ຫຍຸ້ງຍາກຕ່າງ ໆ

5)       ຄະນະບໍລະຫານງານຊົມຣົມໄດ້ຊ່ວຍກັນເອົາໃຈໃສ່ດູແລແລະຄຸ້ມຄອງນັກສຶກສາສົງລາວ ທັ້ງເປັນພຣະສົງແລະສາມະເນນເພື່ອສ້າງຄວາມສາມັກຄີຮັກແພງແລະເປັນເອກະພາບຊ່ວຍເຫຼືອເຊິ່ງກັນແລະກັນ ໂດຍຍຶດໝັ້ນຕາມແນວທາງການປ່ຽນແປງໃໝ່ຂອງພັກລັດໃນດ້ານແນວຄິດການເມືອງ ໄດ້ເອົາໃຈໃສ່ເຜີຍແຜ່ສິ່ງທີ່ດີງາມວັດທະນະທຳລາວສູ່ສັງຄົມປະເທດອ້ອມຂ້າງແລະຕ່າງປະເທດຂະຫຍາຍມູນເຊື້ອອັນດີງາມແລະຄວາມຮັກປະເທດຊາດບ້ານເກີດເມືອງນອນຢ່າງບໍ່ຢຸດຢັ້ງ

6)       ສ້າງອຸດົມການແນວຄິດນັກສຶກສາສົງລາວທີ່ກຳລັງສຶກສາຢູ່ໃນປະເທດໄທໃຫ້ມີຄວາມສາມັກຄີມີລະບຽບວິໄນເອົາໃຈໃສ່ຕໍ່ການສຶກສາຮ່ຳຮຽນໃຫ້ຈົບຕາມຫຼັກສູດທີ່ທາງມະຫາວິທະຍາໄລໄດ້ກຳໜົດໄວ້ຫຼີກເວັ້ນປະກົດການຫຍໍ້ທໍ້ທີ່ເກີດຂື້ນໃນໝູ່ຄະນະອັນເປັນການສ້າງຄວາມແຕກແຍກ ສະກັດກັ້ນແນວຄິດທີ່ບໍ່ດີທີ່ເປັນຜົນຮ້າຍຕໍ່ໝູ່ຄະນະໂດຍລວມ

IV.  ດ້ານຜົນດີ

1)        ພຣະນິສິດນັກສຶກສາສົງລາວສ່ວນຫຼາຍມີຄວາມເສຍສະຫຼະ,ຊ່ວຍເຫຼືອໝູ່ເພື່ອນ, ມີຄວາມຮັກແພງສາມັກຄີກັນດີແລະມີຄວາມຂະຫຍັນໝັ່ນພຽນຕໍ່ການສຶກສາຮ່ຳຮຽນແລະປະຕິດບັດຕາມໜ້າທີ່ຂອງຕົນ

2)        ພຣະນິສິດນັກສຶກສາສົງລາວໄດ້ຮ່ວມກັນເອົາໃສ່ກິດຈະກຳເສີມທັກສະແລະປະສົບການໃຫ້ມີຄວາມກ້າວໜ້າຍິ່ງ ໆ ຂື້ນ ແລະມີການທອດຖອນບົດຮຽນນຳຄູບາອາຈານແລະເພື່ອນ ໆ ສະມາຊິກດ້ວຍກັນ

V.   ບັນຫາແລະອຸປະສັກ

1)        ການຕິດຕໍ່ພົວພັນກັບວິທະຍາເຂດຕ່າງໆ ເພື່ອຖອດຖອນບົດຮຽນແລະແລກປ່ຽນປະສົບການຍັງບໍ່ທົ່ວເຖິງເນື່ອງຈາກການເດີນທາງຮ່ວມກິດຈະກຳມີຄ່າໃຊ້ຈ່າຍຫຼາຍເພາະງົບປະມານບໍ່ພຽງພໍ

2)       ການບໍລິຫານງານຍັງບໍ່ເຂັ້ມແຂງເນື່ອງຈາກສະມາຊິກຕ່າງຄົນຍັງບໍ່ມີປະສົບການດ້ານບໍລິຫານງານຊົມຣົມ ພຣະນິສິດລາວຍັງຂາດຕໍ່ການເອົາໃຈໃສ່ໃນໜ້າທີ່ວຽກງານທີ່ຕົນໄດ້ຮັບມອບໝາຍ

VI.   ຜົນການເຄື່ອນໄຫວວຽກງານກິດຈະກຳທີ່ຜ່ານມາ

1.      ຄະນະນັກສຶກສາສົງລາວຊຽງລາຍໄດ້ເດີນທາງໄປຮ່ວມງານປະຊຸມກັບສະມາຄົມນັກສຶກສາສົງລາວຊຽງໃຫມ່

2.     ກິດຈະກຳຄະລະວະພຣະມະຫາເຖຣະເນື່ອງໃນວັນອອກພັນສາປະວາຣະນາ ຈັງຫວັດຊຽງລາຍ

3.     ກິດຈະກຳສຶກສາດູງານສວນໄຜ່ພໍພຽງຮ່ວມກັບວິທະຍາໄລສົງຊຽງລາຍ

4.     ກິດຈະກຳເຮັດບຸນເຂົ້າສະຫຼາກຮ່ວມກັບວິທະຍາໄລສົງຊຽງລາຍ

5.     ກິດຈະກຳສອນພາສາອັງກິດໃຫ້ພຣະນິສິດລຸ້ນນ້ອງເສີມທັກສະໃນການຮຽນມະຫາໄລ ຯ

6.     ກິດຈະກຳມອບເຄື່ອງອຸປະກອນໃຊ້ໃນໂຮງຮຽນປະຖົມສົມບູນຫ້ວຍທອງ ເມືອງປາກທາ ແຂວງບໍ່ແກ້ວ ປະເທດລາວ

7.     ກິດຈະກຳເຂົ້າຮ່ວມງານອາສາລະຫະບູຊາສຳພັນໄມຕຣີມິຕິພຣະພຸດທະສາສະໜາ ໄທ-ລາວ

8.     ກິດຈະກຳສາທະຍາຍພຣະໄຕຣປິດົກສຳພັນໄມຕຣີມິຕິພຣະພຸດທະສາສະໜາ ລະຫວ່າງ  ໄທ-ລາວ ໃນວັນອາສາລະຫະບູຊາ ທີ່ ວັດພຣະທາດຜາເງົາ ອ.ຊຽງແສນ ຈ.ຊຽງລາຍ

9.     ກິດຈະກຳຖວາຍຜ້າໄຕຣຈີວອນແລະທຽນພັນສາ ທີ່ ວັດຈອມເຂົາມະນີຣັດ ເມືອງຫ້ວຍຊາຍ ແຂວງບໍ່ແກ້ວ ປະເທດລາວ

10.   ກິດຈະກຳແລ່ນເອກະສານວີຊ່າໃຫ້ພຣະນິສິດລຸ້ນນ້ອງທີ່ເຂົ້າມາຮຽນຢູ່ວິທະຍາໄລສົງຊຽງລາຍ

11.    ກິດຈະກຳສອນພາສາລາວໜຶ່ງໃນພາສາອາຊຽນ ທີ່ ວິທະຍາໄລສົງຊຽງລາຍ ມະຫາວິທະຍາໄລມະຫາຈູລາລົງກອນຣາຊວິທະຍາໄລ

12.   ກິດຈະກຳສອນພາສາອັງກິດແລະທັມມະໃຫ້ເດັກສູນສຶກສາພຸດທະສາສະໜາວັນອາທິດທີ່ວັດພຣະທາດຜາເງົາ ຕ.ວຽງ ອ.ຊຽງແສນ ຈ.ຊຽງລາຍ

13.   ກິດຈະກຳສະແດງຄວາມຍິນດີກັບລຸ້ນອ້າຍພຸດທະສາດບັນດິດລຸ້ນທີ່ 59 ວິທະຍາໄລສົງຊຽງລາຍ ມະຫາວິທະຍາໄລມະຫາຈະລາລົງກອນຣາຊວິທະຍາໄລ

14.   ກິດຈະກຳໄປຮ່ວມງານມະຫາກຳພາສາ ສາສະໜາ ແລະວັດທະນະທຳອາຊຽນ ທີ່ ຫໍປະຊຸມ ມວກ. 80 ພັນສາ ມຈຣ. ວັງນ້ອຍ ຈ.ອະຢຸດທະຍາ

15.   ກິດຈະກຳສະແດງມຸທິຕາຈິດທ່ານເຈົ້າຄຸນພຣະພຸດທິຍານມຸນີ ເຈົ້າອາວາດວັດພຣະທາດຜາເງົາ ອ.ຊຽງແສນ ຈ.ຊຽງລາຍ

VII.     ແຜນການພັດທະນາຊົມຣົມນັກສຶກສາສົງລາວຊຽງລາຍ

1.       ຈັດຕັ້ງລະບົບການບໍລິຫານງານຊົມຣົມໃຫ້ມີຄວາມສອດຄ່ອງກັບການບໍລິຫານງານຂອງສະມາຄົມລາວສູນກາງກຸງເທບແລະວິທະຍາເຂດຊຽງໃຫມ່ຢ່າງເປັນລະບົນ ມີແບບແຜນການດຳເນີນງານຢ່າງຖຶກຕ້ອງຕາມລະບຽບກົກໝາຍຂອງພັກແລະລັດວາງອອກເພື່ອໃຫ້ການເຄື່ອນໄຫວກິດຈະກຳນັກສຶກສົງລາວມີຄວາມສະດວກແລະວ່ອງໄວຫຼາຍຂື້ນ

2.     ຈັດຕັ້ງລະບົບການສື່ສານດ້ານຂໍ້ມູນອອນລາຍແລະສ້າງໜັງສືທັມມະເພື່ອນຳໄປອົບຮົມແລະເຜີຍແຜ່ໃຫ້ກັບເດັກແລະເຍົາວະຊົນລາວໄດ້ເຂົ້າໃຈກ່ຽວກັບພຣະພຸດທະສາສະນາຍິ່ງໆ ຂື້ນ

3.     ຊ່ວຍກັນສົ່ງເສີມໃຫ້ມີການຮຽນຮູ້ນອກຫລັກສູດ ເຊັ່ນ ອອກໄປສຶກສາດູງານຕາມສະຖານທີ່ຕ່າງ ໆ ຈັດກິດຈະກຳອັນເປັນອົງຄວາມຮູ້ແລະນຳປະສົບການມາປະຍຸກໃຊ້ໃຫ້ສອດຄ່ອງກັບບ້ານເມືອງເຮົາ

VIII.    ຂໍ້ສະເໜີຕໍ່ທາງວິທະຍາໄລສົງຊຽງລາຍ

1.      ຂໍໃຊ້ຫ້ອງແຜນແລະວັດຜົນເປັນທີ່ທຳງານຂອງຊົມຣົມ

2.     ຂໍຍື່ນສະເໜີຈົບປີ 4 ບໍ່ຕ້ອງລົງປະຕິບັດສາດສະນະກິດ

3.     ຂໍໃຫ້ຜູ້ອຳນວຍການຮັບຮອງເອົາຊົມຣົມນັກສຶກສາສົງລາວເຂົ້າສັງກັດໃນແຜນວິທະຍາໄລສົງຊຽງລາຍ

4.     ຂໍໃຊ້ຫ້ອງປະຊຸມວິທະຍາໄລສົງຊຽງລາຍເປັນທີ່ປະຊຸມຂອງນັກສຶກສາສົງລາວ

5.    ຂໍທືນຄ່າ non-imigrant visa ໃຫ້ພຣະນິສິດລາວທີ່ມາສຶກສາຢູ່ວິທະຍາໄລສົງຊຽງລາຍ